Pangyayari sa paligid tunay na hindi maipinta
Laganap na ngang lubos ang mga krimen at katiwalian
Idagdag mo pa ang mga nangyayaring mga digmaan
Ilang henerasyon ang dumaan, hindi pa rin mawala
Tumatangis at naghihinagpis ang ating Inang Bayan
Sa mga gawaing hindi makatao at makatarungan
Nasadlak sa dusa’t dilim, sa liwanag napagkaitan
Masikatan ng panibagong araw ay inaasahan
Tayo’y natulad kay Huli na naaliping bayad-utang
Tayo’y natulad kay Sisa na binaliw ng kahirapan
Isiping mabuti, sino talaga ang may kasalanan
Hindi ba tayong mga Juan na nagpaalipin naman
Modernong panahon na, nakaraa’y nauulit pa rin
Ugnayan natin sa pamahalaan ay masasalamin
Sa pamamahala ng bansa hindi magkaunawaan
Kaya naman naging resulta, protesta kaliwa’t kanan
Saan man tignang anggulo, tayo pa rin ang nagkasala
Inihalal na pinuno, ngayo’y gusto nating alisin
Sino bang naghalal, hindi ba tayo rin namang mga Juan
Nasa atin ang may mali at wala sa pamahalaan
Gumising, kalayaan sa paghalal ay gamiting tama
Matuto tayo na bumangon mula sa mga pagdurusa
Ng ang kawawaan ng bayan ay tuluyan ng mabura
Sama-sama nating masisilayan ang bagong simula.
Walang komento:
Mag-post ng isang Komento